रुकुमपूर्व, फागुन ६ । चुनावी अभियानका क्रममा जिल्लाका विभिन्न विकट स्थानको भ्रमणपछि नेपाली कम्युनिष्ट पार्टी का संयोजक पुष्पकमल दाहाल ‘प्रचण्ड’ ले पत्रकार सम्मेलन गर्दै भदौ २३ र २४ गते भएका घटनाका विषयमा तथा त्यसपछिको निर्वाचनबारे आफ्नो धारणा सार्वजनिक गर्नुभएको छ।
उहाँले जेन्जी युवामाथि भएको हत्या, देश जलाउने प्रवृत्ति र राष्ट्रवादका पक्षमा देश बचाउने शक्तिबीच प्रतिस्पर्धा चलिरहेको बताउनुभयो।
उहाँले विशेषगरी २३ गते साँझ भएको नरसंहार तथा २४ गते भएका आगजनी र विध्वंसका घटनालाई गम्भीर रूपमा लिन आग्रह गर्नुभयो।
“२३ गते साँझ नपुग्दै भएको नरसंहारको हामीले तत्काल विरोध गरेका थियौं। त्यसअघि पनि सरकारको नेतृत्वले गरेका कामको हामीले निरन्तर विरोध गर्दै आएका थियौं,” उहाँले भन्नुभयो।
उहाँका अनुसार ती घटनाप्रति सम्बन्धित पक्षले आत्मसमीक्षा गर्नुपर्नेमा त्यसो नगरी ‘गल्ती भएको छैन’ भन्ने प्रवृत्ति देखिनु खतरनाक संकेत हो।
“गल्ती स्वीकार नगर्ने प्रवृत्ति देखिएको छ। यदि जनताले यसलाई बुझेनन् भने भविष्यमा फेरि यस्ता घटना दोहोरिन सक्छन्,” उहाँले चेतावनी दिनुभयो।
त्यस्तै, २४ गते भएका आगजनी तथा विध्वंसका घटनामा वामपन्थी तथा लोकतान्त्रिक दलका घरमा आक्रमण भएको उल्लेख गर्दै उहाँले देशलाई अस्थिर बनाउने शक्तिको इसारामा चल्ने प्रवृत्ति देखा परेको दाबी गर्नुभयो।
“त्यो नेपाललाई नियन्त्रणमा राख्न चाहने शक्तिको इसारामा चल्ने प्रवृत्ति हो,” उहाँले स्पष्ट गर्नुभयो।
प्रचण्डले २३ र २४ गते देखिएका दुवै गलत प्रवृत्तिविरुद्ध आफ्नो पार्टी स्पष्ट रूपमा उभिएको बताउनुभयो।
“यी दुवै गलत प्रवृत्तिविरुद्ध हामी नेपाली जनतालाई सचेत गराइरहेका छौं। २३ र २४ गतेका जस्ता घटना फेरि नदोहरिन हाम्रो पार्टी प्रतिबद्ध छ,” उहाँले भन्नुभयो।
उहाँले हाल देशमा तीन प्रकारका प्रवृत्तिबीच संघर्ष चलिरहेको उल्लेख गर्दै यो अवस्था जनमतसंग्रह जस्तै बनेको बताउनुभयो। कुन प्रवृत्तिलाई जिताउने भन्ने निर्णय अब जनताले गर्ने समय आएको उहाँले जोड दिनुभयो। साथै, देश जलाउने, हिंसा र दमन गर्ने प्रवृत्तिविरुद्ध सशक्त अभियान आवश्यक रहेको उहाँको भनाइ थियो।
“अब जनताले फैसला गर्नुपर्छ। सुशासन, सामाजिक न्याय, समृद्धि र राष्ट्रियताको पक्षमा उभिन जरुरी छ। देशको पक्षमा काम गर्न सकिएन भने फेरि मुलुक दुर्घटनामा पर्न सक्छ,” उहाँले भन्नुभयो। देश दुर्घटनामा नजाओस् र समाजवादको यात्रामा अघि बढोस् भन्ने संकल्पका साथ आफू अघि बढिरहेको उहाँले दोहोर्याउनुभयो।
निर्वाचनबारे भइरहेको ‘फिक्सिङ’को चर्चा अस्वीकार गर्दै उहाँले निष्पक्ष निर्वाचन भए नेपाली कम्युनिष्ट पार्टी पहिलो शक्ति बन्ने दाबी गर्नुभयो।
“देशभरबाट प्राप्त रिपोर्टअनुसार निष्पक्ष निर्वाचन भयो भने नेपाली कम्युनिष्ट पार्टी पहिलो बन्छ। देश र जनताको पक्षमा काम गर्ने पार्टी नेपाली कम्युनिष्ट पार्टी नै हो,” उहाँले बताउनुभयो।
