दाङ, असार २ । नेपाल मगर संघ जिल्ला समन्वय समिति दाङको आयोजनामा मंगलबार घोराहीमा मगर बहुउद्देश्यीय सांस्कृतिक भवन उद्घाटन तथा एकदिने भूमे महोत्सव–२०८३ सम्पन्न भएको छ। विभिन्न समुदायका प्रतिनिधि तथा सर्वसाधारणको सहभागितामा घोराही बजार क्षेत्रमा बृहत् र्याली निकालिएको थियो भने कार्यक्रम घोराहीस्थित सहिद मञ्चमा भव्य रूपमा आयोजना गरिएको थियो।
घोराही उपमहानगरपालिका–१८, ढोडेनीमा निर्माण गरिएको नेपाल मगर संघको नवनिर्मित भवनको उद्घाटन पूर्वअर्थमन्त्री तथा नेकपा (माओवादी केन्द्र) का उपमहासचिव वर्षमान पुन ‘अनन्त’ले गर्नुभएको हो।
कार्यक्रमलाई सम्बोधन गर्दै पूर्वअर्थमन्त्री पुनले आफू अर्थमन्त्री रहेका बेला भवन निर्माणका लागि एक करोड रुपैयाँ बजेट विनियोजन गरेको स्मरण गर्नुभयो। “नेपाल मगर संघले भवन निर्माणका लागि अनुरोध गरेपछि मैले अर्थमन्त्री हुँदा एक करोड रुपैयाँ बजेट विनियोजन गरेको थिएँ। आज उक्त भवन उद्घाटन तथा हस्तान्तरण गर्न पाउँदा खुसी लागेको छ,” उहाँले भन्नुभयो।
भूमे पर्व मगर समुदायको मौलिक संस्कृति, परम्परा र जीवनपद्धतिसँग जोडिएको महत्वपूर्ण पर्व भएको उल्लेख गर्दै पुनले मगर जातिको भाषा, संस्कृति र सभ्यताको संरक्षण गर्नु राष्ट्रकै सांस्कृतिक सम्पदाको संरक्षण भएको बताउनुभयो।
“मगर समुदायले आफ्नो भाषा, संस्कृति र पहिचानलाई पुस्तान्तरण गर्दै आएको छ। नयाँ पुस्तालाई संस्कृति र परम्परासँग जोड्दै संरक्षण अभियानलाई निरन्तरता दिनु सकारात्मक विषय हो,” उहाँले भन्नुभयो।
नेपाल बहुजातीय, बहुभाषिक, बहुधार्मिक तथा बहुसांस्कृतिक विशेषता भएको देश भएकाले सबै समुदायको पहिचान र अधिकारको सम्मान हुनुपर्ने पुनको भनाइ थियो। उहाँले राजनीतिक आन्दोलनसँगै जातीय, भाषिक, सांस्कृतिक तथा सामाजिक अधिकारका मुद्दाहरू पनि सशक्त रूपमा उठेको उल्लेख गर्दै संघीयता, समावेशिता, धर्मनिरपेक्षता र स्वायत्तताजस्ता विषय संविधानमार्फत संस्थागत भएको बताउनुभयो।
“संविधानले सबै जाति र समुदायलाई समान अधिकार दिएको छ। नेपालमा बोलिने सबै भाषालाई राष्ट्रभाषाको मान्यता प्रदान गरिएको छ। प्राप्त अधिकारको संरक्षण गर्दै थप अधिकार संस्थागत गर्न पनि निरन्तर संघर्ष आवश्यक छ,” उहाँले भन्नुभयो।
संविधान संशोधनको बहस चलिरहेका बेला उत्पीडित जाति, समुदाय, महिला, दलित तथा पिछडिएका क्षेत्रले प्राप्त गरेका अधिकार कुनै पनि बहानामा कमजोर पार्न नहुने धारणा व्यक्त गर्दै पुनले सबै राजनीतिक दललाई समावेशी उपलब्धिको संरक्षण गर्न आग्रह गर्नुभयो।
उहाँले नवनिर्मित भवनले मगर समुदायका सामाजिक, सांस्कृतिक, शैक्षिक तथा चेतनामूलक कार्यक्रम सञ्चालन गर्न सहज वातावरण सिर्जना गर्ने विश्वास व्यक्त गर्नुभयो। भवन समुदायको एकता, जागरण र सांस्कृतिक उत्थानको केन्द्र बन्ने उहाँको भनाइ थियो।
कार्यक्रमको अध्यक्षता नेपाल मगर संघ दाङका अध्यक्ष मुक्त बुढा मगरले गर्नुभएको थियो भने सञ्चालन सचिव प्रकाश पुन मगरले गर्नुभएको थियो।
