घोराही, जेठ ३१ । दाङ वितरक संघको वार्षिक साधारण सभा तथा स्थापना दिवस कार्यक्रम दाङको घोराहीमा भव्य रूपमा सम्पन्न भएको छ। साधारण सभामा संस्थाका महासचिव नारायण प्रसाद पाण्डेले सांगठनिक प्रतिवेदन र कोषाध्यक्ष केशव डि.सी. ले आर्थिक वर्ष २०८१/२०८२ को विस्तृत आर्थिक प्रतिवेदन तथा नाफा-नोक्सान विवरण प्रस्तुत गर्नुभएको थियो। कार्यक्रममा उपस्थित सम्पूर्ण सदस्यहरूबीच दुवै प्रतिवेदनमाथि सघन र रचनात्मक छलफल गरी आगामी कार्यदिशा सर्वसम्मत रूपमा पारित गरिएको छ।
वि.सं. २०६६ सालमा दाङ जिल्लाका वितरक व्यवसायीहरूलाई एकीकृत गर्ने दूरगामी उद्देश्यका साथ संस्थापक अध्यक्ष प्रा.डा. अर्जुन कुमार बुढाथोकीको नेतृत्वमा यस संघको स्थापना भएको हो। साधारण सभामा प्रतिवेदन प्रस्तुत गर्दै महासचिव पाण्डेले संस्थालाई वर्तमान उचाइसम्म पुऱ्याउन प्रत्यक्ष एवं अप्रत्यक्ष रूपमा अमूल्य योगदान दिने सम्पूर्ण अग्रज, सल्लाहकार र कार्यसमिति सदस्यहरूप्रति हार्दिक आभार प्रकट गर्नुभयो। हाल संघको आफ्नै कार्यकक्ष नहुँदा सचिवालय सञ्चालनमा केही आर्थिक कठिनाइ देखिए तापनि कार्यसमिति व्यवसायीहरूको हकहित र संरक्षणका लागि निरन्तर क्रियाशील रहेको जानकारी गराइएको थियो।
आजको २१औँ शताब्दीको आधुनिक युगमा गुणस्तरीय, स्वच्छ, मर्यादित र कानुनी रूपमा व्यवसाय सञ्चालन गर्नु अपरिहार्य रहेको कुरामा प्रतिवेदनले विशेष जोड दिएको छ। राज्यलाई नियमसंगत कर तिरेर व्यवसाय गर्दा पनि वितरकहरूले राज्यबाट पाउनुपर्ने उचित सेवा, सुरक्षा र प्रोत्साहन नपाएको गुनासो व्यवसायीहरूले गरेका छन्। बजारमा देखा परेका ‘मिसिङ्ग बिलिङ्ग’ र ‘अन्डर बिलिङ्ग’ जस्ता गम्भीर प्राविधिक एवं कानुनी समस्याहरूले गर्दा स्वच्छ रूपमा व्यवसाय गर्नेहरू मर्कामा परेकाले यसको दीर्घकालीन समाधानका लागि राज्यको ध्यानाकर्षण समेत गराइएको छ।
संस्थाले गत वर्ष विभिन्न महत्वपूर्ण सांगठनिक गतिविधिहरू सफलतापूर्वक सम्पन्न गरेको छ। नेपाल वितरक महासंघको १४औँ वार्षिक साधारण सभा तथा किराना व्यवसायी समितिको साधारण सभा र अधिवेशनमा संघको पूर्ण र सक्रिय सहभागिता रहेको थियो। यसैगरी राप्ती अञ्चल लिङ्कर एसोसिएसनको वार्षिक साधारण सभामा सक्रिय सहभागिता जनाउनुका साथै बजार व्यवस्थापनलाई सहज बनाउन दैनिक लिक्विड सप्लायर्सको समस्या सहजीकरणमा संस्थाले नेतृत्वदायी भूमिका निर्वाह गरेको छ। संघले आर्थिक वर्ष २०८२/०८३ मा आफ्ना सदस्यहरूको नवीकरण कार्यलाई तीव्रता दिँदै लगभग ९६ प्रतिशत नवीकरण सम्पन्न गर्न सफल भएको सुखद तथ्याङ्क समेत सार्वजनिक गरेको छ।
कोषाध्यक्ष केशव डि.सी. द्वारा प्रस्तुत आर्थिक वर्ष २०८१/२०८२ को आम्दानी-खर्च, वासलात तथा नाफा-नोक्सान विवरण अनुसार संस्थाको आर्थिक गतिविधिलाई पारदर्शी, उत्तरदायी र मितव्ययी बनाउन विशेष जोड दिइएको छ। सदस्यहरूको सहयोग, नियमित सदस्यता शुल्क, नवीकरण शुल्क र विभिन्न सहयोगी संघ-संस्थाहरूबाट प्राप्त रकमलाई नियमअनुसार चुस्त राखिएको छ। संघको आर्थिक अवस्था दीर्घकालीन आम्दानीको स्रोतमा आधारित नरहेकाले संस्थागत रूपमा कार्यालय सञ्चालन गर्न केही कठिन भइरहेको प्रतिवेदनमा स्वीकार गरिएको छ। आगामी दिनमा संघको आर्थिक स्रोतलाई थप सुदृढ बनाउँदै संस्थागत विकास र सदस्यहरूको हितमा प्रभावकारी कार्यक्रमहरू सञ्चालन गर्न विशेष ध्यान दिइने प्रतिबद्धता कोषाध्यक्ष डि.सी. ले व्यक्त गर्नुभयो।
साधारण सभाले संस्थाको दिगो विकास र व्यावसायिक गरिमाका लागि विभिन्न आगामी रणनीतिक योजनाहरू समेत पारित गरेको छ। जस अन्तर्गत कार्यक्षेत्र भित्रका सम्पूर्ण वितरक व्यवसायीहरूलाई एकजुट बनाई विभिन्न कम्पनीहरूसँगको समन्वयमा बजारिकीकरणमा सहयोगी भूमिका खेल्ने निर्णय गरिएको छ। संघको विधान र नियम अनुसार संस्थाका गतिविधिहरूलाई थप चुस्त, दुरुस्त र पारदर्शी बनाउँदै लगिनेछ। विशेष गरी संघको कार्यालयलाई थप प्रभावकारी बनाउन र दैनिक कार्य प्रणालीलाई आधुनिक रूप दिन डिजिटल प्रविधिको व्यवस्था गरिने योजना अघि सारिएको छ। व्यवसायीहरूबीच आपसी समन्वय बढाउन र सदस्यता वृद्धि गर्नका लागि विभिन्न सेवामुखी र व्यावसायिक क्षमता अभिवृद्धि कार्यक्रमहरू सञ्चालन गर्दै लैजाने प्रतिबद्धताका साथ कार्यक्रमको समापन गरिएको थियो।
प्रकाशित मिति : २०८३ जेष्ठ ३१ गते आइतवार
