एच.आर. मिडिया हाउसको आयोजना तुलसीपुरमा ‘खुल्ला रक्तदान’ दाङ, ३-चैत । दाङको तुलसीपुरमा रगतको अभाव हुन नदिने उद्देश्यले खुल्ला रक्तदान कार्यक्रम गरिएको छ । मानवताको सेवा नै जीवनको सर्वोत्तम कार्य भन्ने उद्देश्यका साथ एच. आर. मिडिया हाउस प्रा लि को आयोजना तथा ग्लोबल ओरेन्स नेपाल तुलसीपुरको सहकार्यमा शनिबार तुलसीपुरमा रक्तदान कार्यक्रम गरिएको हो ।
मिडिया हाउसका प्रबन्धक एच. आर. मगरको अध्यक्षता तथा शान्तिनगर गाँउपालिकाका अध्यक्ष प्रमोद बस्नेतको प्रमुख आतिथ्यता एवम युथ्स अफ तुलसीपुरका अध्यक्ष ऋषिराज लहरे (अरुण)को विशिष्ठ आतिथ्यतामा कार्यक्रम भएको हो । शान्तिनगर गाउँपालिकाका अध्यक्ष प्रमोद बस्नेतले यस मिडिया हाउसले समाजमा गरेको मानवीय कार्य प्रशंसनिय रहेको उल्लेख गर्दै उनले संस्थाले आयोजना गरेको कार्यक्रममा पहिलो पटक रक्तदान गरेको बताएका छन् ।
कार्यक्रमका प्रमुख अतिथि समेत रहेका बस्नेतले मानवीय सेवामा स्थानीय सरकारको पनि महत्वपूर्ण भुमिका रहेको बताएका छन् । साथै आगामी दिनमा पालिकाले यस्ता खालका कार्यमा सहकार्य गर्ने समेत प्रतिवद्धता व्यक्त गरेका छन् । त्यस्तै युथ्स अफ तुलसीपुरका अध्यक्ष ऋषिराज लहरे (अरुण)ले रक्तदान नै जीवन दान भएको उल्लेख गरेका छन् ।
कार्यक्रमका विशिष्ट अतिथि समेत रहेका लहरेले जिल्लाको पश्चिम क्षेत्रमा रगतको कमी हुन नदिने उद्देश्यले गरिएको कार्यक्रमको प्रशंसा गर्दै उनले युवाहरुलाई यस्ता खालका सामाजिक कार्यहरुमा अग्रसर हुन प्रेरणा मिल्ने समेत बताए । त्यस्तै कार्यक्रममा नेपाल पत्रकार महासंघ दाङका सह-सचिव दिप्तिशिखा चौधरी, लायन्स क्लब अफ क्यापीटल दाङका अध्यक्ष दिपक केसी लगाएतले सामाजिक कार्यमा मिडिया हाउसले खेलेको भूमिकाको प्रशंसा गरेका थिए ।
ग्लोबल ओरेन्स नेपाल तुलसीपुरका प्रमुख मनोज चौधरीको स्वागत मन्तव्यबाट शुरु भएको कार्यक्रमको सहजिकरण गायक तथा उद्घोषक शान्ताराम सेन्चुरीले गरेका थिए । तुलसीपुर उपमहानगरपालिका ६ बरुवागाँउ स्थित युथ्स अफ तुलसीपुरको कार्यालय परिसरमा भएको रक्तदान कार्यक्रममा ४६ जनाले रक्तदान गरेका छन् ।
